Ахтыылар
Убайым курдук саныыр киһим этэ
Сидоров Семен Егорович улаханнык убаастыыр, ытыктыыр, убайым курдук саныыр киһим этэ. Мин кинини олох кыра эрдэхпиттэн билэр этим диэтэхпинэ сыыспатым буолуо. Ол курдук кэрэ өйдөбүллэр хаалбыттара. Семен Егоровиһы кытта үлэһит буолан баран үчүгэйдик алтыспытым. 1996 сыллаахха Евдокия, Петр Герасимовтар нэһилиэккэ убаастанар ыал улахан кыыстарын Мария Петровнаны кытта ыал буолбуппут. Онтон саҕаламмыта үчүгэйдик билсиһиибит. Сэмэн Бүөтүрдүүн уу тэстибэт табаарыстыылар этэ бэйэ-бэйэлэригэр наһаа убаастыбыллаахтык сыһыаннаһаллара, көмөлөсүһэллэрэ. Мас тиэйиитэ, идэһэ өлөрүүтэ Сэмэнэ суох ааспат этэ. Биир оннук кэмҥэ чэйдии олорон Сэмэнтэн ыйытааччы буоллум: "Эһи Аннаҕынаан "Оһохтооххо" ыал буолбуккут дии"- диэтим. Онно Сэмэн наһаа соһуйда, кырдьык онно холбоспуппут диэтэ. Эн өйдүүр эбиккин дии диэтэ. Мин кыра сылдьан доярка мамалаах буолан, мамабын Акулина Семеновналыын батыһан Оһохтооҕунан, Хатараанньанан, дойдубутугар, Бүтэйдээҕинэн, Таппалааҕынан, Нэлэгэринэн кыстыыр этибит. Халыйаары гынным дуу, Анналаах Сэмэн мин 8-пар 9-пар ыал буолбуттара. Эппитим курдук "Оһохтооххо" оччолорго биһи балаҕаҥҥа олорбуппут Анналаах элбэх буолан дьиэҕэ кыстаан олороллоро. Биир үтүө күн дьон бөҕө кэллэ, ас бөҕө тардылынна Анналаах Сэмэн ыал буолбуттара сылын чопчу этэр кыаҕым суох. Оччолорго радио диэни соччо билбэт этим, арай биир үтүө күн, дьиэбиттэн балаҕаҥҥа дылы туох эрэ пробатын, төгүрүк тэриэлкэни киллэрэн, туруордулар дьэ сонун көстүү этэ, Биһи оҕолор көрүү истии бөҕө буоллубут. Онтубут радио диэн эбит. Дьэ үлэһит киһи этэ. Хайдах үс күн бүтүн ферма биир ый сиир отун маһын хааччыйарын өйбөр батарбаппын, биһи утуйарбытыгар тракторынан отун таһа барар быһылааҕа, сарсыарда турдахха эмиэ от анньан кэлэрэ. Хаһан утуйан, аһаан, сылдьалларын өйүм хоппот. Таппалаахха кыстаан олордохпутуна, сарсыарда 6-та чааска икки тракторынан от кэлэрэ, күнү быһа таһаллара, киэһээ хойут төннөллөрө, баран иһэн аны Дириҥҥэ илдьэллэр үһү, дьонум кэпсииллэрэ. Оҕолорго наһаа үчүгэй сыһыаннааҕа.
Сэмэн Егорович мин өйбөр туруу үлэһит, үчүгэй аҕа, нэһилиэк олоҕор, үлэтигэр хамнаһыгар, инники күөҥҥэ сылдьар, эдэр дьоҥҥо холобур эрэ буолар, киһи кэрэмэһэ Сэмэн Егорович.
Анналаах Сэмэн оҕолоро эмиэ ийэлэрин аҕаларын батан, үлэһит үтүөтэ, ыал бэттэрэ буолан, тыанан куоратынан, үлэлээн-хамсаан дьоннорун аатын үрдүктүк тутан сылдьалларыттан киһи эрэ үөрэр.
Ахтыыны оҥордум Н.В. Портнягин