Ахтыылар
Чугастык истиҥник саныыбыт
Биһиги Эрилик-Эристиин аатынан колхоз Дириҥ дэриэбинэтигэр 1971 сыллаахха Хаяхсыт ниһилиэгиттэн көһөн кэлбиппит. Василий онно мастерскойга слесарынан үлэлии киирбитэ, 1973 сыллаахха дылы үлэлээбитэ. Сайынын Нуотараҕа окко баран Сэмэн Дьөгүөрэбиһи кытта бииргэ үлэлии сылдьан тырахтарыыстыырга үөрэнэн тырахтарыыс буолбута. Тыраахтара алдьаннаҕына Сэмэн Дьөгүөрэбистэн сүбэлэтэн-амалатан оҥорор этэ. Онтон ыла бииргэ үлэлээн-хамсаан сылдьыбыттара, үөрүүлэрин-көтүүлэрин бииргэ үллэстэллэрэ. Миэхэ Василий – Семен Егорович диэн киһилиин бииргэ үлэлиибит, элбэх оҕолоохтор, кэргэнэ Анна диэн фермаҕа дояркалыыр – диэн эппитэ. Биһиги икки улахан оҕолорбут Сэмэн Дьөгүөрэбистээх оҕолорун кытта бииргэ үөрэммитттэрэ, Хатаска көһөн кэлиэхпитигэр дылы. Хатаска кэлэн баран кинилэри суохтуурбут ахтарбыт, Василий соҕотохсуйар буолбута. Күһүн аайы отпускатын ыллаҕына сынньанан, күүлэйдээн, бултаан, балыктаан астынан кэлэрэ. Аан бастаан Хатаска биһиги уолбут уруутугар иккиэн кэлэн үөрэн-көтөн, түүннэри ахтылҕаммытын таһааран кэпсэтэн-ипсэтэн барбыттара. Онтон оҕолоро куоракка баар буоланнар, киирдилэр эрэ быһа ааспаттар этэ. Өттүк харалаах, илии тутуурдаах дойдубут аһын амсаталлара. Аана күлэн-үөрэн аргыый аҕайдык дойдубут солунун кэпсиирэ, итиитик санатара. Кыыспыт билиҥҥэ дылы Аананы сылаастык-сымнаҕастык саныыр. Оскуолаҕа баран кэлэн иһэн таарыйдаҕына итии чэйин, күөрчэҕин билигин да саныыр. Кинилэр үтүө санаалара, сүбэлэрэ-амалара хаһан да умнуллубат. Кинилэр уоллара Семен Семенович биһиги сөбүлээн Сэмэнчик диэн ааттыыбыт. Кини Хатаска уһаайба ылан, дьиэ туттан быр бааччы олорор. Сотору-сотору кэлэн билсэн көмөлөһөн, таарыйан ааһар. Телефонунан да билсэр, солунун кэпсээн сэргэхситэр. Аана Сэмэн Сиидэрэптэр кэнэҕэскилээх, кэскиллээх ыал буолан. Оҕолоро үтүө үлэһит, ыал дьон буоланнар оҕолонон-урууланан этэҥҥэ сылдьалларыттан биһиги үөрэбит. Кинилэргэ олохторо куруутун сырдыгынан, кэрэнэн, үөрүүнэн, үйэлээҕинэн, тапталынан тобус-толору буоллун. Айыыһыттаргыт араҥаччылыы, арчылыы сырыттыннар - диэн алгыспытын аныыбыт.
Табаарыстара Василий, Галина Петровтар
2019 с. Хатас нэһилиэгэ.