Ахтыылар
Үлэһит дьиэ кэргэн
Семен Егорович, Анна Андреевна Сидоровтар Эрилик Эристиин аатынан колкоз, совхоз Хоптоҕотооҕу отделениетын төһүү үлэһиттэрэ. Семен Егорович үйэтин тухары тиһиликтээх тракторга үлэлээбитэ. Саас сир, бааһына оҥоруута, сайын от үлэтэ, кыһынын от тиэйиитэ. Налба оҥоһулла илигинэ кэбиһиилээх оту эттээн трактор сыарҕатыгар тиэйэн таһаллара. Колельнайдарга оттук мас тиэллиитэ, ДТ биир соһуутун түүнүнэн оттон бүтэрэллэрэ. Аны совхоз үлэтин таһынан Дирин курдук улахан бөһүөлэк чааһынай ыалын отун-маһын тиэйиитэ. Кыайыгас, эрдэһит Семен Егорович сарсыарда хараҥаттан киэһээ олох хойут кэлэрэ. Аны трактор алдьанан кэллэҕинэ түүннэри оҥостон үлэҕэ бэлэм буолара. Улахан дьиэ кэргэн аһа-таҥаһа, оҕолорун тэрийии, амарах аҕа, кыһамньылаах кэргэн Семен Егорович трактора өрүү үчүгэй туруктаах буолан горючай экономиялаан улахан эталонҥа үлэлээн оройуоҥҥа бастаан “Запорожец” автомашинанан наҕараадаламмыта. Сайынын Халааны үрэҕэр ыччат полумех звенотун салайан оттотон улахан көрдөрүүнү ситиһэрэ. Кини тракторист эрэ буолбатах, тэрээһиннээх звеневод, ылыннарыылаах салайааччы.
Ыһыллыы да кэнниттэн кини ДТ тракторын ыһыктыбакка от-мас тиэйэн ити ыарахан кэмҥэ улахан үлэни оҥорон дьонун-сэргэтин абыраабыта.
Оҕолорун, сиэннэрин түмэн үлэһит, эппиэтинэстээх дьон гына иитэн Дуураҥатын алааһын сэргэхситэн үлэ күөстүү оргуйан, оҕо чуор куолаһынан толорбута. Кэргэнигэр Анна Андреевнаҕа олус истиҥ сыһыаннаах этэ, биирдэ эмэ эрдэ кэллэҕинэ “Чычаас” ферматыгар тиийэн көмөлөһөрө.
Анна Андреевна сааһын тухары ыанньыксыт, “Бырыы” сыйылыгар сайынын оскуола оҕолорун кытта үлэлээн элбэх оҕону ыанньыксыт үлэтигэр уһуйбута. Оччолорго кыргыттар 2 буолан уоппускаҕа барбыт доярканы солбуйаллара. Оҕолор саас эрдэттэн мин биригэдьиирдии сырыттахпына “Бырыыга” тахсабыт диэн үлэһэллэрэ. Анна Андреевна киэҥ-холку этэ, оҕолорго тылын ылыннарара, үүтү түһэрбэт туһугар салайара, тэрийэрэ. Оччолорго ынаҕы күҥҥэ үстэ 25 ынаҕы ыыллара. Анна Андреевна 1966 сыллаахха “Лучшая доярка” диэн Саха Автономнай Советскай Социалистическай Республикатын знагынан наҕараадаламмыта.
Анна Андреевна элбэх оҕо күн-күбэй ийэтэ. Үлэттэн кэлэн баран оҕо таҥаһын, аһын бэрийии манан аҕай буолбатах. Анна сүрдээх кыайыгас үлэһит, үрдүк ыамы ситиһэн элбэх грамотанан наҕараадаламмыта.
Анна Андреевна, Семен Егорович күүрээннээх үлэлэрин элбэх наҕараадалар, грамоталар туоһулууллар. Иллээх дьиэ кэргэн оҕолорун, сиэннэрин үлэҕэ уһуйан дьоҥҥо-сэргэҕэ ытыктанар үлэһиттэри иитэн дьоллоох ыал.
Нахсылова Любовь Степановна,
Чурапчы улууһун уонна Хоптоҕо нэһилиэгин бочуоттаах олохтооҕо,
Тыа хаһаайыстыбатын ветерана, Саха республикатын ветерана, үлэ ветерана.