Аҕабыт суруйбут хоһоонноро
Хоһооннор
***
Доҕоччугуом үгүс дьонноох кулууп дьиэбэр эргичийэ тэлээрэн,
Нарын музыка абылаҥын иитигэр куустарыахпыт.
Доҕоччугуом дыргыл сыттаах аралыйар алааспар дьиэрэкэйдээн тэлээрэн,
Күөрэгэйим ырыатыгар уйдаран, дьоролдьуйан дуоһуйуохпут.
Доҕоччугуом ыраас чаҕыл уулардаах көлүйэлиир ууларбар,
Умсаахайдаан суунаммыт ууллаахайдаан ымманьыйыахпыт.
Доҕоччугуом кэрэ-кэскил кэһиилээх дьоллоохойдуур суолугар,
Сэгэлдьийэ хаамаммыт аргыстаһаахтаан олоруохпут.
***
Сирдээҕи аналбар эйиэхэ анааммын,
Сирдээҕи кэскилбин уруйдаан ыллыыбын.
Сиэдэрэй сибэкким киэркэйэр кэрэтин,
Хоһуйан мин тойук туойабын!
Уһанынсан кэллибит олохпут устата,
Уруйдаах норуоппут кэскилин туһугар.
Урааҥхай сахабыт норуотун туһугар,
Уруйдаах-махталлаах тылларбын этэбин!
Саас-үйэ тухары самныбат саргыны,
Салайсан кэллибит кэнчээри ыччакка.
Саҥалыы сайдыбыт сахабыт дойдута,
Сандаара-сыдьаайа туруохтун өрүүтүн!
***
Арыы-сүөгэй быйаҥнаах,
Таптыыр, ахтар мин дойдум.
Чараас сиидэс былааттах,
Дыргыл сыттаах алааһым.
Сайылыкпар тардыстар,
Сырдык ыраас кэмнэри,
Титииктэрбин саныыбын,
Уонна кыра саастарбын.
Оҕо сааһым доҕотторун,
Көрүстэрбин эрэ мин.
Дьэдьэн, отон сыттардаах,
Сайылыкпын ахтабын.
***
Таптаабын сайыҥҥы өҥүрүк куйааска,
Лаглайбыт хатыҥым күлүгэр сытарбын.
Кыракый күөрэгэй күөх халлаан үрдүгэр,
Кэрэни-күндүнү уруйдуу туойарын.
Таптыыбын кыһыҥҥы бытархан тымныыга,
Халыҥ хаар анныгар баттатан тураргын.
Чысхаантан чаҕыйбат дьулуургун,
Сайыны көһүтэр тулуургун.