Аҕабыт суруйбут ахтыылара
Карпов Иван Иванович туһунан ахтыы
Иван Иванович Өлүөхүмэтээҕи училищены 1974 с. үөрэнэн бүтэрэн кэлэрин кытта совхоз салалтата Хадаарга механигынан анаабыттара. Нөҥүө ылыгар Мэлдьэхсигэ хотон механизациятын оҥорон үлэлэппитэ. Сайынын Чыкырга “Хара хомустаах” дуойкатын оҥорон, Хайахсытка ферма уотун оҥорууга, Хадаар “Самнаҕайдаах” сайылыгар дуойка систиэмэтин киллэриигэ, Хоптоҕо “Бырыы” ферматын дуойкатын, дизельнэй станцияны үлэлэтэн ферма ыарахан үлэтин механизациялаан. чэпчэтэн элбэх доярканы абыраабыта.
Пестерев Кирил иколаевич пенсияҕа тахсыаҕыттан Хоптоҕо отделениетыгар 1976 сылтан пенсияҕа тахсыар диэри халбаннаабат механик буолан кэллэ.
Түүннэри-күнүстэри ханна техника алдьанар да барытыгар кини тиийэн оҥорон бары механизатордар махталбыт улахан. Исаков ньыматынан от кэбиһэри эмиэ Федулов Николай Гаврильевичтыын оҥороннор (1984 сыллаахха) бастаан Посельскай Михаил Афанасьевич звеневодтаах, Посельскай Константин Николаевич трактористаах үлэҕэ киллэрбиттэрэ. Иккис сылыгар сварщик Каженкин Павел Васильевич көннөрүүтүнэн үөһээттэн тарыйан таһаарарын уларытан транспортер үрдүгэр сүгэн таһаарар гына оҥорбуттара. Бэрт элбэхтик ходуһабыт маһа-сыыһа дэлэй буолан алдьанан Уйбааммытын ыҥырдахпытына баар буолара. Мустарааччыбыт Михаил Афанасьевич мас сыыһын барытын хомуйан кэнникинэн мээлэ алдьаммат буолбуппут. Оҕустарааччыларбыт Попов Петр Петрович, Васильев Василий Дмитриевич, Родионов Аркадий Николаевич, Иванов Афанасий Афанасьевич уһуннук үлэлээбиттэрэ. Звенобут отун күрүөтүн оҥорууга механикпыт көҕүлээһининэн остоолбо умуһаҕын хаһар тэрили сварщик Каженкин Байбаллыын оҥорон биэрбиттэрэ. Оттуур алаастарбыт аайы остоолбо күрүө тутаммыт, сыл аайы күрүө оҥорбот буолбуппут. Кэнники “Чибилигэ”, “Тардар эбэҕэ” ходуһаларбыт күрүөтүн оҥороммут билигээҥҥэ дылы абырыы турар. Совхозпут эстэн хаалбытын кэннэ элбэх ыалга күрүө тутталларыгар көмөлөһөн, бу буурбунан остоолболорун үүтүн үүттээн абыраатым, көмөлөстүм.
Бастаан колхозка эдэр сылдьан икки хас сыл от кыдамалаан, илии үлэтин техниканан солбуйдахха диэн санааттан тракторист буолбутум. Механикпар Иван Ивановичка, тракторга учууталбар, РСФСР үтүөлээх механигар Пестерев Кирил Николаевичка көмөлөрүн иһин улахантан улахан махталбын тиэрдэбин.
Ахтыыны суруйдум Сидоров Семен Егорович